西班牙海鮮飯

上星期六，一行9人去澳門拜山之旅，表妹帶我地去咗間餐廳食飯，其中有個飯好好食，就係西班牙海鮮飯，材料有蜆、蝦、青口、魷魚同洋蔥，差不多600大元，不過真係好食，而且我地成12個人，價錢都ok ~

記得之前睇蘇 GOOD 教過呢個飯啲做法，加埋上網搵咗啲食譜，做法都係差唔多，尋日去咗買番紅花粉，時關番紅花比較貴，個售員話花粉都可以用嚟整海鮮飯，所以買住花粉試吓先，成功咗先買番紅花嚟整

材料 : (2-3人份量)

蝦                                  半斤

蜆                                  1斤

青口                               半斤

洋蔥                               半個

蒜蓉                               1茶匙

蕃茄                               1個

意大利米                         200g

湯雞                               200ml

白酒                               200ml

番紅花粉                         1包

紅椒粉                            1茶匙

做法 :

蝦洗淨，剪去眼、腳、尾部尖位、挑去蝦腸及取去蝦腦，備用

蜆、青口用水浸數小時吐沙後，隔去水份，清洗外殼，青口撕去毛髮，備用

洋蔥切細粒、蕃茄洗淨切細粒，備用

下油將蝦煎至8成熟，盛起備用

下油爆香洋蔥、蒜蓉、蕃茄及意大利米，加入白酒至收乾水份後加入番紅花粉及紅椒粉略炒，加入雞湯用小火蓋上蓋煮10分鐘，加入蝦、蜆及青口，蓋上蓋用中火煮10-15分鐘至熟透，食得 ~