呢個係近期大少要 encore 啲田雞泥鯭粥，大少唔鐘意係街食田雞因為驚煮得唔熟喎 ~ 食泥鯭粥又要走骨，所以要自己煲先得啦，未有高速煲之前大少要食粥我只係會係星期六、日先會煲，事關我驚煲焦，哈哈 ~ 而家有咗個好幫手 (高速煲)，嘩 .... 咁快就煲好，所以大少幾時想食粥都得啦 
記得買高速煲啲時候，大少仲問我係未癲架 .... 千幾蚊買個煲，但係當大少忽然想食粥、牛腩煲又或者係炆豬手啲時候，就會話有高煲煮，好快就食得啦 ~ 
又時男人都會善變架 .... 嗯
又時男人都會善變架 .... 嗯 
材料 : (2人份量)
泥鯭 1斤
田雞 4隻
白米 1杯
水 8杯
果皮 1片
腐竹 1塊
做法 :
田雞切件抺乾水份後，用胡椒粉及紹酒略醃，備用
白米洗淨，果皮洗淨浸軟刮瓤，腐竹用水沖洗後整碎，備用
煲滾4杯水，加入已洗淨之泥鯭灼熟後盛起，泥鯭起肉備用
將灼泥鯭啲水加入餘下4杯水、米、果皮及腐竹，放入高速煲用大火煮滾後，轉小火煮15分鐘後熄火，待高速煲自動排氣後，加入田雞煮至熟透，最後加入泥鯭煮滾，加鹽調味，搞掂食粥啦 ~
小小心得 :
如果覺得啲粥太杰，可以係煮田雞啲時候加啲熱水，調至合適啲希杰度 煲好啲粥加入田雞、泥鯭煮滾時要用大火，啲粥就唔會癲底架啦 ~
今日試了,好好味呀..
回覆刪除[版主回覆04/11/2010 22:31:00]係呃 ~ 真係好味架 !!
你好,elaine 想問下
回覆刪除白米洗淨， 果皮洗淨浸軟刮瓤 (這個解什麼?) ，腐竹用水沖洗後整碎，備用
將灼泥鯭啲水加入餘下4杯水 (係咪即係將d戈煮過泥鯭既4杯水) 、米、果皮及腐竹，放入高速煲用大火煮滾後，轉小火煮15分鐘後熄火，待高速煲自動排氣後， (lee 度係咪由壓力煲轉番普通煲煮ar?) 加入田雞煮至熟透，最後加入泥鯭煮滾加鹽調味 (田雞同泥鯭點先算熟ga?) ，搞掂食粥啦 ~
因為母親節想用岩岩買既壓力煲(5L) 煲lee個粥比家人食,第一次用壓力煲,第一次煮粥...同埋起碼8個人食度,份量點調好.....所以有d愚昧...
感謝幫忙,謝謝!
[版主回覆05/06/2010 19:33:00]果皮一般都會刮瓤先煮 (老人家話好啲喎)
我將灼泥鯭啲水加埋落去煲係唔想浪費, 哈哈
高速煲排氣後我會轉返高速煲原廠啲普通煲蓋 (我係用 lagostina 啲高速煲架, 所以要轉煲蓋) 田雞最好煮熟啲 5-10分鐘啦.. 啲泥鯭我係灼熟起肉, 所以返熱就ok 啦 ~ 我呢個份量只係2-3人食, 如果你要8個人食, 就要最少2-3杯米啦.. 水分係1:8, 即係1杯米加8杯水 (要睇吓你鐘意食咩粥.. 我鐘意杰身啲架) 但要注意用高速煲煮五榖類 (如 : 粥, 豆, 米..) 材料加埋水唔好多過半煲, 如果米加水啲分量多過半煲, 你可以先將全部米及部份水加入煲內用高速煲15分鐘, 待排氣後, 中-大火開蓋加入其餘水份煲返希啲粥, 仲有用高速煲煲五穀類啲食物一定要等高速煲自動排氣 ~ 希望幫到你啦 !!