川貝燉雪梨

每逢轉天氣我就好易病，初時會喉嚨唔舒服慢慢就嚟氣管敏感發作，咳到癲肺，記得鄭爸爸還在的時候，就會整川貝燉雪梨個我，鄭爸爸總話要連埋啲渣一齊食唔係無用架。而家每逢轉天氣總會諗起鄭爸爸啲燉雪梨

呢幾日天氣轉冷，經過生果舖見到有天津鴨梨，諗起鄭爸爸啲燉雪梨，依希記得啲材料，買幾個鴨梨返屋企燉嚟潤吓先 ~

材料 : (1人份量)
鴨梨                           2個
川貝                           3錢 (約12g)
南北杏                        少許
冰糖 / 蜜糖                 適量
水                               1-2碗


做法 :
鴨梨洗淨留皮去芯切件，川貝 (最好壓爛嚟燉)、南北杏洗淨，備用
將所有材料放入燉盅內，用中火燉1小時，搞掂 ~