白果胡椒豬肚湯

尋日無啦啦想飲豬肚湯，去到豬肉鋪老細話買曬豬肚，諗住去第2間買，個老細叫我今日先煲，留返個靚靚豬肚比我，佢實在太好人，即刻答應佢，今日再去買豬肚，老細仲留咗啲靚豬骨過我，正呀 ~

材料 :

新鮮豬肚                        1個

豬骨                              適量

白果                              20粒

白胡椒粒                        2湯匙

薏米                              2湯匙

腐竹                              1片

水                                 2公升

做法 :

白果去殼，用熱浸10分鐘後去衣、去芯，備用

薏米洗淨，備用

白胡椒洗淨後壓碎，備用

豬骨汆水後，備用

豬肚先剪走表面白色肥膏，將豬肚反轉 (翻向內)，用生粉揉擦，再用清水洗淨黏在豬肚的黃色黏膜，重覆3-4次，汆水過冷過後用小刀刮走豬肚椗表面白苔後，切件備用

凍水加入腐竹煲滾後，加入其他材料，大火煲滾後，轉小火煲2 - 2.5小時，用鹽調味，飲得 ~

清洗豬肚可參考 : 煮日學

粟米魚肚湯

整咗個黃鱔煲仔飯，本來諗住煲返個湯飲吓，去到街市見到啲魚肚諗起粟米湯，最後整咗個粟米湯，搞掂一餐 ~

材料 :

粟米湯                        1罐

粟米粒                        1碗 (可以唔加)

魚肚                           1 1/2両

水 / 上湯                     500 ml

做法 :

魚肚略洗，用水浸軟後，切成粒狀，煲滾1煲水，加入薑、蔥煮滾後加入魚肚汆水，隔去水份過冷河備用

煲滾水 / 上湯加入、粟米粒及粟米湯煮滾，再加入魚肚煮滾後加鹽調味，完成

   飲湯啲時間可以加啲胡椒粉，好好味架 ~

黃鱔煲仔飯

尋晚突然好想食黃鱔飯，今日天氣凍凍地，所以整返個煲仔飯食吓 ~

之前都整過呢個煲仔飯，真係好快又好味，有時想偷吓懶都會用高速煲嚟整煲仔飯，見今日有時間所以就用煲仔整，其實都好方便架

加埋個粟米魚肚湯，yummy ~

粟米魚肚羮做法

 

材料 : (2人份量)

黃鱔     1條

白米     1 1/2杯

水    1 杯

 

醃料 :

胡椒粉 小許

紹酒     適量

薑汁     適量

調味料 :

煲仔飯醬油   適量

 

 

做法 :

黃鱔洗淨切條後用醃料醃好備用

白米、水放入煲內，用中火煲煮滾 (圖1)，後加入黃鱔 (圖2) 轉小火煮10-15分鐘 (圖3)，熄火焗10-15分鐘，加入煲仔飯醬油撈勻 (圖4)，開飯啦 ~

川貝燉雪梨

每逢轉天氣我就好易病，初時會喉嚨唔舒服慢慢就嚟氣管敏感發作，咳到癲肺，記得鄭爸爸還在的時候，就會整川貝燉雪梨個我，鄭爸爸總話要連埋啲渣一齊食唔係無用架。而家每逢轉天氣總會諗起鄭爸爸啲燉雪梨

呢幾日天氣轉冷，經過生果舖見到有天津鴨梨，諗起鄭爸爸啲燉雪梨，依希記得啲材料，買幾個鴨梨返屋企燉嚟潤吓先 ~

材料 : (1人份量)
鴨梨                           2個
川貝                           3錢 (約12g)
南北杏                        少許
冰糖 / 蜜糖                 適量
水                               1-2碗


做法 :
鴨梨洗淨留皮去芯切件，川貝 (最好壓爛嚟燉)、南北杏洗淨，備用
將所有材料放入燉盅內，用中火燉1小時，搞掂 ~

九肚魚粉絲湯

呢個湯係一位潮州人教我既，都有一段時間無整過，係街市見到啲九肚魚好靚所以諗起呢個湯

個湯好快就搞掂，又可以用嚟做餸，正呀

材料 :

九肚魚                        1斤

粉絲                           1包 (細)

肉碎                           半磅

冬菜                           適量

雞湯                           1公升

芫茜                           適量 (切碎)

肉碎醃料 :

胡椒粉                        少許

生抽                           1茶匙

麻油                           1茶匙

紹酒                           少許

九肚魚醃料 :

魚露                           4湯匙

胡椒粉                        少許

紹酒                           少許

做法 :

九肚魚洗淨切段，用醃料醃15-30分鐘，肉碎用醃料醃好，粉絲用水浸軟，備用

下油爆香、冬菜、肉碎後加入雞湯煮滾

再加入九肚魚、粉絲煮滾後加鹽調味，最後加入芫茜碎，搞掂飲湯啦 ~

魚香茄子炆伊麵

魚香茄子煲係大少好多時出街食飯都會叫嚟食啲其中一個餸，但係每次都會話太油，對於食慣住家飯啲大少當然係太油啦 ~ 事關我地係少油少鹽啲家庭嘛

有次大少話想食魚香茄子，但又想食伊麵，我將啲茄子同肉碎用醬煮好，再加入伊麵兜勻，大少好鐘意食，久不久就想食吓 ，佢今日又話想食啦，好就嚟一碟魚香茄子炆伊麵個你啦

材料 :

茄子                        4條

肉碎                        半磅

伊麵                        2個

蒜容                        1湯匙

醃料 :

糖                           1茶匙

生抽                        1茶匙

麻油                        1茶匙

古椒粉                     少許

紹酒                        適量

醬料 :

豆板醬                     1湯匙

魚香茄子醬              1湯匙

魚露                        1湯匙

鎮江醋                     1/2湯匙

糖                           2茶匙

麻油                        適量

做法 :

肉碎用醃料醃好，備用

伊麵用滾水煮開，盛起隔去水份後過冷河，備用

茄子洗淨切段，下油爆香，盛起備用 (茄子好吸油架 ~ 唔好落太多油，平煎炸就可以)

下油爆香蒜容、肉碎，加入醬料兜勻，將茄子回鑊煮滾，調至合適味道後加入伊麵兜勻，最後加入麻油兜勻，食得 ~

豬頸肉炒烏冬

前幾日見到廚櫃有包烏冬，為咗消滅包烏冬決定今晚用嚟炒 ~

平時炒粉麵我鐘意用煲仔飯醬油，事關夠方便嘛，唔洗又老抽又生抽，一支醬油就搞掂，今次用嚟炒烏冬唔知咩味呢

材料 :

烏冬                                  2個

豬頸肉                               半包 (略醃備用)

舞菇                                  1包 (去蒂備用)

椰菜                                  半個 (切絲)

煲仔飯醬油                        適量

黑椒粒                               適量

蒜容                                  適量

做法 :

下油爆香蒜容、豬頸肉、舞菇及椰菜

加入烏冬炒開後再加入黑椒粒及煲仔飯醬油炒勻，成完開餐

田雞泥鯭粥

呢個係近期大少要 encore 啲田雞泥鯭粥，大少唔鐘意係街食田雞因為驚煮得唔熟喎 ~ 食泥鯭粥又要走骨，所以要自己煲先得啦，未有高速煲之前大少要食粥我只係會係星期六、日先會煲，事關我驚煲焦，哈哈 ~ 而家有咗個好幫手 (高速煲)，嘩 .... 咁快就煲好，所以大少幾時想食粥都得啦  

記得買高速煲啲時候，大少仲問我係未癲架 .... 千幾蚊買個煲，但係當大少忽然想食粥、牛腩煲又或者係炆豬手啲時候，就會話有高煲煮，好快就食得啦 ~  又時男人都會善變架 .... 嗯

材料 : (2人份量)

泥鯭                        1斤

田雞                        4隻

白米                        1杯

水                           8杯

果皮                        1片

腐竹                        1塊

做法 :

田雞切件抺乾水份後，用胡椒粉及紹酒略醃，備用

白米洗淨，果皮洗淨浸軟刮瓤，腐竹用水沖洗後整碎，備用

煲滾4杯水，加入已洗淨之泥鯭灼熟後盛起，泥鯭起肉備用

將灼泥鯭啲水加入餘下4杯水、米、果皮及腐竹，放入高速煲用大火煮滾後，轉小火煮15分鐘後熄火，待高速煲自動排氣後，加入田雞煮至熟透，最後加入泥鯭煮滾，加鹽調味，搞掂食粥啦 ~

小小心得 :

   如果覺得啲粥太杰，可以係煮田雞啲時候加啲熱水，調至合適啲希杰度

   煲好啲粥加入田雞、泥鯭煮滾時要用大火，啲粥就唔會癲底架啦 ~

豉油皇炒麵

今日大少放假，食完 tea 佢話今晚想食粥同炒麵

田雞泥鯭粥係近期大少至愛啲粥，加埋個炒麵搞掂

材料 :

炒麵                        2個

蔥 (切段)                 4棵 (蔥白及青分開)

芽菜                       半斤

調味料 :

生抽                       2湯匙

老抽                       1茶匙

糖                          適量

麻油                       適量 (後下)

做法 :

炒麵用凍水浸30分鐘，隔去水份，備用

白鑊略炒芽菜，盛起備用

下油爆香蔥白，加炒麵炒至乾身，加入調味料炒勻，再加入芽菜及蔥段，調至適合味道，熄火加入麻油炒勻完成       

金銀菜豬肺湯

今日空氣污染破記錄新高，對環保署呼籲市民，患有呼吸或心臟毛病者可能會受到影響

我一向有氣管敏感，每次轉天氣，空氣污染我就好容易氣管敏感咳到癲肺，所以今日整返個豬肺湯補吓肺氣先 ....

材料 :

菜乾                           2両

白菜                           1斤

豬肺                           1個

瘦肉                           4両

南北杏                        1湯匙

蜜棗                           2粒

果皮                           2片

水                              適量

做法 :

豬肺套入水龍頭，注入水令豬肺膨脹，然後用手擠壓排出水分，重複數次，直至豬肺變白色，排出水份為白色 (可叫豬肉店代為清洗)

將豬肺切件用白鑊煮當豬肺出水後盛起，隔去水份，回鑊重複數次，取出豬肺用清水洗淨，備用

菜乾用水浸透後洗淨、白菜、南北杏及蜜棗洗淨、陳皮浸軟刮去瓤、瘦用洗淨汆水，備用

煲滾水，加入所有材料，用大火煮滾後改用細火煲2.5 - 3小時，用鹽調味完成

蔥油餅

蔥油餅大少真係好鐘意食，今年係老飯店食團年飯嗰陣，大少一見到就即刻唊嚟食，跟住大叫好食

好多時係街見到我都會買比大少食架 ~

見到通少整蔥油餅，想試吓整比大少食

材料 :

中筋麵粉                        200g

鹽                                  1/4湯匙

熱水                               60 ml

凍水                               80 ml

配料 :

蔥 (切粒)                        2杯

菜油                              3湯匙

鹽                                  1/4茶匙

胡椒粉                            1/2茶匙

做法 :

麵粉過篩後放入碗內，加入熱水，用麵棍/筷子順一方向攪成小塊，再逐少加入凍水 (分3-4次)，轉用手搓粉糰，直至粉糰軟身但不能黏手為止，繼續搓動粉糰 (約3分鐘) 至粉糰光滑有彈性，將麵粉灑於碗底，放入麵糰後蓋上熱濕布 (無水滴出個種)，放於微波爐或焗爐內20分鐘 (醒麵)

將油燒至霧煙，蔥放於篩上，下面放一個受熱啲碗後，灑上滾油湯過蔥粒，油留用 (即蔥油)，蔥粒加入鹽、胡椒粉攪勻，備用

枱面及麵粉棍掃上蔥油，將粉糰分成4份，將粉糰用棍壓平後平均掃上蔥油及灑上蔥粒，捲成腸粉狀後，再捲成軟雪糕狀

取1份雪糕狀粉糰掃上蔥油後用棍再壓平至薄餅狀，下油起鑊後用中火將粉糰煎至2面金黃，其餘3份粉糰按照以上做法逐個壓平至薄餅狀及煎至金黃完成

食譜來源 : 通之廚房

http://hk.myblog.yahoo.com/tony-karen/article?mid=42037&prev=41413&next=-1

泡菜炒年糕

本來係想整韓式粉絲架  買灑材料但係買唔到韓國粉絲有啲氣死，平時唔整粉絲就成箱係面前 ，今日想諗就無貨，暈 ....

無論係上海定韓國年糕大少都好鐘意食，其實大少有咩唔鐘意食既呢  ，真係諗唔到喎 ~

材料 :

急凍韓國年糕                        1包 (約 600g)

韓國泡菜                               1包 (200g)

急凍肥牛                               1包

本菇                                      1包

蔥 (切段)                                2棵

紅蘿蔔 (切絲)                         半碗

醬料 :

韓國辣椒醬                            1湯匙

酒                                         1茶匙

生抽                                      2湯匙

水                                         4湯匙

糖                                         2茶匙

做法 :

年糕用凍水浸15-30分鐘，隔去水份，肥牛略醃，本菇去蒂，備用

下油落肥牛炒至7-8成熟，盛起備用

下油爆香蔥段、泡菜、紅蘿蔔、本菇及年糕，加入醬料，蓋上鑊蓋煮5分鐘至年糕軟身，將肥牛回鑊煮熱熄火，最後加入少許麻油，完成

日式鰻魚炒飯

尋日整蠔仔粥，煮飯啲時間專登整多2碗飯，留返今日用嚟炒飯

本來想跟通少整菠蘿海鮮炒飯，不過炒飯對我嚟講係好難架 ~ 仲要加埋海鮮真係無咩信心，之前炒飯唔係太濕就係太黏鑊，所以我比較少整炒飯，多得通少啲提點，今次都算成功 ，真係要多謝通少指教 ~

材料 :

日式鰻魚                        1條

雞蛋                              2隻 (用生抽及胡椒粉拌勻)

粟米粒                           半碗

冷飯                              2飯

魚子                              適量

調味料 :

鰻魚汁                          2湯匙

生抽                              少許

鹽                                 少許

做法 : 

鰻魚用180度焗爐，焗5-10分鐘後切粒，備用

下油加入半份雞蛋快炒後，加入冷飯炒香，再加入餘下之雞蛋炒至乾身

加入鰻魚粒、粟米粒炒勻後，再加入調味料炒勻熄火後加入魚子，完成

蠔仔肉碎粥

尋日大少話好奈無食過蠔仔粥，今日見到街市啲蠔仔幾靚買咗啲返嚟煲蠔仔肉碎粥比佢食

  

材料 :

蠔仔                        1斤

肉碎                        適量

白飯                        2碗

雞湯                        1公升

蔥粒                        適量

莞茜 (切碎)              適量

中國芹菜 (切粒)        適量

冬菜                        適量

肉碎醃料 :

生抽                        1茶匙

糖                           少許

麻油                        少許

酒                           少許

胡椒粉                     少許

調味料 :

鹽                           少許

魚露                        少許

胡椒粉                     少許

大地魚粉                  少許

(想香啲可以買大地魚干，去頭同骨用油炸香後切粒，會香啲架，但我同大少都唔多鐘意食，所以用咗大地魚粉代替)                       

做法 :

蠔仔用生粉攪勻後用水洗乾淨 (重覆3-4次)，再將蠔仔汆水備用 (啲蠔仔有好多碎既殼黐係蠔身，大家清洗啲時候要留意呀)。

煲滾雞湯後加入肉碎、白飯及冬菜煮滾，加入調味料調至合適味道後，加入蠔仔及芫茜煮滾後熄火，加入蔥粒及芹菜粒。

肉丸意粉

呢嗰肉丸係我多年前係一間大型傢俬店入面啲餐廳食過，後嚟睇 cable 知道原來有急凍啲賣，所以買咗包肉丸返屋企用蕃茄醬煮好再加埋意粉，真係好好食 ~

今日唔想出街食，打開冰箱見到有肉丸所以就嚟個肉丸意粉，加埋個芝士蒜溶西蘭花，搞掂

 

材料 : (2人份)

意粉                                            200g

意大利肉醬意粉醬                        200g

肉丸                                            20-30粒

蕃茄 (切粒)                                  4個

洋蔥 (切粒)                                  半個

蒜溶                                            1湯匙

辣椒仔                                         數十滴

香草                                            少量

水                                               適量

做法 :

下油爆香蒜溶、洋蔥及蕃茄粒後，加入肉醬炒香，再加入肉丸及辣椒仔 (如果肉醬乾身可加入少許水一同煮)，用中火煮15-30分鐘，加入鹽、糖調味後加入意粉煮滾，最後加入香草，食得 ~

小心得 :

煲滾水加入1-2湯匙鹽，加入意粉煮至8-9成熟 (按包裝指示之時間減去2-3分鐘)，煮好直接加入醬汁內拌勻調味即可無須過冷過 。

煮意粉減去啲2-3分鐘就係加入醬汁嗰到煮滾，意粉吸收醬汁啲時間啦 ~ 所以煮好意粉後唔好過冷過呀，過咗冷過意粉就好難吸收啲醬汁啦 !

如果煮好啲意粉個醬汁仲未煮好就可以用篩先隔去煮意粉啲水，加少許油拌勻後將意粉灘開，待煮好醬汁再加入意粉，咁啲意粉就唔會淋身架啦 !

蕃茄蛋餃

之前睇都市閒情教整蕃茄蛋餃，大少又鐘意食蕃茄炒蛋，今次咁灑佢啦 ~

當大少知道今日整蕃茄蛋餃，第一時間啲反應係無肉架 ~ 唔係呀

材料 :

蕃茄                           4個

雞蛋                           4隻

餃子皮                        半斤

做法 :

蕃茄去剥皮去籽，切成細粒，用篩隔去水份，備用。

雞蛋加入生抽打勻，下油炒至乾身，切成細粒。

蕃茄粒及雞蛋粒拌勻成餡料，包成餃子，煲滾水加入餃子煮至浮面，即可。