蠔豉皮蛋粥

近期唔係食buffet、放題就係打邊爐，今日咁凍又唔多想出街街，最好就係煲返個粥清吓腸胃 .. 屋企有腐竹、皮蛋同蠔豉，就用嚟煲粥啦

材料 :

米                            1杯

腐竹                        1塊

水                            2公升

皮蛋                        2隻

蠔豉                        8粒

陳皮                        1塊

調味 :

鹽                            適量

做法 :

1.  蠔豉用水浸軟，切粒，陳皮浸軟去囊，備用。

2.  將所有材料放入煲內，煲至水滾後，用高速煲，煲15分鐘，熄火至高速煲自行排氣，下鹽調味即可。

XO醬豬頸肉炒麵

天氣終於回暖無咁凍，可以唔洗再整煲仔菜啦 不過有時都好難諗整咩食，大少order 炒麵佢食，去到超市大部份啲嘢都係用嚟打邊爐，見到啲豬頸肉就用嚟炒麵啦..

材料 :

豬頸肉                                1包

椰菜                                    半個

炒麵                                    2個

蔥                                        適量

XO醬                                  適量

煲仔飯醬油                        適量

鹽                                        適量

做法 :

1.   椰菜洗淨切絲、蔥洗淨切段，炒麵用凍水浸30分鐘，隔去水份備用。

2.   下油鑊香蔥段、豬頸肉、下XO醬及椰菜，炒香後再加入炒麵，炒至干身，下煲仔飯醬油及鹽調味即可。

紫菜豆腐湯

今日好想飲紫菜湯，買埋豆腐滾湯啦

材料 :

紫菜                        1片

豆腐                        1件

水                            1公升

魚餃                        1盒

薑                            1-2片

做法 :

1.   紫菜洗淨，隔去水份，備用。

2.   煮滾水下薑，煲滾加入豆腐、魚餃及紫菜滾15分鐘，下鹽調味即可。

   可用魚湯代替清水，會好味啲架 ~

        個湯又快又好飲，仲可以用豬肉碎代替魚鮫

桂花魚蟹粥

凍咗成個禮拜，唔係食煲仔飯就打邊爐，今日清吓腸胃整返個粥先

材料 :

桂花魚                        1條

花蟹                            2隻

腐竹                            1片

果皮                            1片

米                                1杯

水                                2公升

薑絲                            適量

芫茜                            適量

蔥                                適量

醃料 :

胡椒粉                        適量

酒                                適量

魚露                            適量

做法 :

1. 桂花魚切片，用醃料醃15分鐘，花蟹洗整切件，備用。

2. 將米、水、腐竹及果皮放入煲內，用大火煮滾，再用高速煲煮15分鐘，待煲自動排氣後，關蓋加入桂花魚、花蟹薑絲煮熟，下鹽調味，加入芫茜及蔥，食得 ~

臘味糯米飯

今日終於無咗寒冷天氣警告啦.. 不過都係得10幾度，尋晚買咗1孖臘腸，1孖潤腸整完煲仔飯，今日用埋嚟整糯米飯就最好

材料 :

臘腸                                  1條

潤腸                                  1條

冬菇                                   6隻

干貝                                   2粒

糯米                                   1杯

水                                       1杯

煲仔飯醬油                        適量

做法 :

1.   冬菇、干貝用水浸軟，冬菇切粒，干貝拆成絲，備用。

2.   臘腸、潤腸用水清洗後，切成粒，備用。

3.   燒熱煲下臘腸粒、潤腸粒、冬菇粒及干貝絲爆香，加入糯米及水，蓋上煲蓋，用高速煮5分鐘，待高速煲自動排氣後，開蓋加入煲仔飯醬油攪勻即可。

臘味煲仔飯

今晚大少去飲，見天氣咁凍最好都係食熱騰騰啲煲仔飯..  無錯又係煲仔飯 ~






材料 :
臘腸                                    1條
潤腸                                    1條
冬菇                                    4隻
溫室荳苗                            適量
米                                        半杯
水                                        半杯
煲仔飯醬油                        適量


做法 :
1.   冬菇去蒂浸軟，臘腸、潤腸用水洗淨，備用。
2.   將米、水煮煲5分鐘至水滾 (其間用筷子攪伴)，下臘腸、潤腸及冬菇約10分鐘，再加入荳苗煮後熄火焗5分鐘，下煲仔飯醬油即可。

黃鱔煲仔飯

天寒地凍最好就係食煲仔飯，今日就嚟整返個黃鱔煲仔飯先..

平時我會用高速煲整煲仔飯，今日見有時間所以用返瓦煲，煲出嚟會香啲架，平時無咩時間，高速煲快嘛 

搞掂啦.. 照完相第1時間食返碗先 ~ 想知點整食埋再話你知，實在太好味啦 ..

材料 :

黃鱔                                    1條

椰菜                                    半個

米                                        1杯

水                                        1杯

薑                                        適量

酒                                        少許

麻油                                    少許

胡椒粉                                少許

煲仔飯醬油                        適量

做法 :

1.   黃鱔叫魚舖起骨，在黃鱔表皮粘上生粉，用刀刷去表面潺液 (或用熱浸黃鱔表皮約1-2分鐘，過凍水後再用刀刷去表面潺液)，切件後用薑絲、酒、麻油及胡椒粉醃15分鐘。

2.   瓦煲放入米、水蓋上煲蓋，用大火煮至水滾，其間不時用筷子搞伴 (約5分鐘，開始收水，飯面有泡泡)，開蓋放入黃鱔及椰菜轉細火蓋上煲蓋煮熟 (約10分鐘)，熄火焗5-10分鐘，開蓋加入煲仔飯醬油，攪勻即可。 

   如用高速煲，將米、水，黃鱔及椰菜，蓋上煲蓋煮5分鐘後加煲仔飯醬油，攪勻即可。

清湯牛腩煲

今日真係煲仔日，整完羊腩煲再嚟羊腩煲，其實我好少食牛，但係屋企有人唔食羊，所以每次整羊腩煲都會整埋牛腩煲

材料 :

原塊牛腩                        1斤

蘿蔔                              1條

清雞湯                           1公升

酸梅                               2粒

月桂葉                            2片

冰糖                               適量

薑                                  適量

芹菜                               適量

鹽                                  適量

做法 :

1.  蘿蔔去皮切件，原塊牛腩飛水洗淨備用。

2.  將清雞湯煲滾加入酸梅、月桂葉、冰糖，冰糖煮溶後，再加入牛腩，用高速煲煮15分鐘，將牛腩取出切件備用。

3. 下蘿蔔用高速煲煮2-3分鐘，將牛腩放回煲內煮滾後下芹菜，鹽調味即可。

 

   牛腩原塊炆好先切件可以保留肉汁，好味啲架 ~

惹味羊腩煲

今日得16度，終於等到天氣轉冷可以整羊腩煲啦 ~  冬天食羊腩煲真係好正架.. 今朝去咗街市同牛肉佬留咗羊腩同牛腩，放工去攞咗就返屋企炆 !!

材料 :

羊腩                            2斤

馬蹄                            1磅

冬菇                            20隻

南乳                            1大磚

惹味醬                        1小杯     

薑                                適量

蔥                                適量

酒                                適量

水                                適量

鹽                                適量

枝竹                            適量

做法 :

1.   羊腩斬件用白鑊爆香，加入薑片、酒炒香，放入滾水至肉面煮數分鐘，羊腩盛起隔水備用。

2.   冬菇用水浸軟，隔水備用 (冬菇水可以代替水嚟炆羊腩架)，馬蹄去皮。

3.   下油加入薑片、南乳及惹味醬爆香，放入羊腩炒勻，下酒後加入冬菇、馬蹄，再加水至羊腩面，用高速煲煮15分鐘，最後加入枝竹煲10分鐘，下鹽調味後灑上蔥即可。

   食用時可用腐乳醬加入檸檬葉絲伴食。

字母湯肉丸通粉

又係晚餐啲時間啦 ~ 要快啲.. 就嚟做麗妃啦 !! 原本諗住整蕃茄牛肉通粉，大少話想食字母湯通粉喎 無法啦，鬼叫佢係大少咩

材料 :

雜菜字母湯                        1罐

快熟通心粉                        1包

肉丸                                    數粒

椰菜                                    1個 (切件)

水                                        適量

做法 :

1.   煲滾水煮熟通心粉，隔水備用。

2.   煲滾水加入雜菜字母湯、加入肉丸及椰菜煮熟，加入通粉，最後加入 tabasco及鹽調味即可。

　  加啲 tabasco 帶有少少辣味，會好味啲架 ~

莞茜皮蛋魚片湯

今日大少放假去咗打  war game，所以我要自已開餐，今日好想飲莞茜湯，去到超市見到有魚片同莞茜好開心，買齊材料返屋企即刻煲個湯先 ~ 咁就可以一邊飲湯一邊睇麗妃同貴妃.. 哈哈 !!

材料 :

莞茜                        大量

魚片                        1條

皮蛋                        2隻

茶瓜                        2元

水                            1公升

做法 :

1.  魚片切片後下鹽調味，備用。

2.  煲滾水下莞茜、茶瓜，煲至莞茜黃綠色 (好似西洋菜湯咁呀)，約30分鐘，下魚片、皮魚 (切件)，煲10分鐘，下鹽調片即可。

鴨絲炒麵

今日大少話想食炒麵呀.. 放咗工去 Market Place 見到有鴨胸買，1包20幾蚊，買多包豬手只係40蚊，睇落幾平喎 ~ 原本2包夾埋要成50幾蚊，宜家40蚊就得.. 就將啲鴨胸切絲炒麵啦..豬手就加餸，嘩 ~ 正 !!

材料 :

鴨胸                            1包 (切絲)

炒麵                            2個

洋蔥絲                        半個

蔥                                3棵  (切段)

鮮菇                            1包

做法 :

1.  用凍水將麵浸25-30分鐘，隔水備用。

2.  下油鑊香洋蔥絲、蔥段 (白色部份)、鮮菇，加入麵炒至乾身，下鴨胸絲炒香。

3.  加入煲仔飯醬油、鹽調味，最後加入蔥段。

一般炒粉麵，我都鐘意用煲仔飯醬油代替生油及老抽，再加少許鹽調味就可以，大家都不如試吓 !!

薯仔沙律

大少最近生飛滋無咩胃口，今日特然想食沙律，咁留然係整好鐘意食啲薯仔沙律啦..

材料 :

新薯                          4個

紅蘿白                      2條

粟米粒                      1盒

西芹                          2條

雞蛋                          2隻

沙律醬                      適量

鹽                              適量

黑椒                          適量

做法 :

1)  將雞蛋放入煲，加水至雞面，煲至水滾後轉中火，煮5-8分鐘至蛋熟，待冷蛋白切粒，蛋黃壓碎備用。

2)  煲滾水下鹽，放入新薯煲15-30分鐘，去皮切粒。

3)  西芹及紅蘿白切粒。

4)  將蛋黃加入沙律醬攪勻，將新薯、蛋白、西芹、粟米粒及紅蘿白攪勻加入沙律醬，加鹽及黑椒調味即可。

健康版西瓜盅

今日放咗工諗住去上海街買個米老鼠月餅模，唉.. 又係搵唔到咁心水啲模，最後放棄落咗朗豪坊買維他命比貓咪食，返到屋企熱到就嚟溶又係30幾度 ~ 諗起前晚睇蘇 GOOD 教整鹹、甜西瓜盅，等我都整返個食吓先.. 

材料 :

西瓜                    半個

哈蜜瓜                 1個

士多啤梨              1盒

芒果                    3個

冰                       大量

做法 :

1.  將要西瓜、哈蜜瓜挖球，士多啤梨、芒果切粒備用。

2. 將西瓜、哈蜜瓜挖球餘下果肉放入攪拌機攪成果汁，加入生果及冰，放入雪至雪凍即可。

生果本身有大量果糖，即晚食用所以無加糖水。

食譜來源 : 改自蘇 GOOD

奶黃脆皮月餅

好開心今年終於學埋奶黃脆皮月餅啦 .. 初初諗住好難整，整整吓唔係想像中咁難 ..以前整月餅都會量吓每個皮同餡啲份量，希望每日都平均嘛  點解無咗個磅架 !! 咁大獲 .. 今次真係要考吓自已啦 .. 努力 !! 哈哈 .. 我係第一盤入爐架，好緊張呀 ~ 15分鐘，等 .... 出爐啦 !! 個樣都幾好 .. yeah !!

禮盒裝當然係留返比朋友仔試吓啦 ~

奶黃脆皮月餅

好開心今年終於學埋奶黃脆皮月餅啦 .. 初初諗住好難整，整整吓唔係想像中咁難 ..以前整月餅都會量吓每個皮同餡啲份量，希望每日都平均嘛  點解無咗個磅架 !! 咁大獲 .. 今次真係要考吓自已啦 .. 努力 !! 哈哈 .. 我係第一盤入爐架，好緊張呀 ~ 15分鐘，等 .... 出爐啦 !! 個樣都幾好 .. yeah !!

禮盒裝當然係留返比朋友仔試吓啦 ~

迪迪尼之旅

今朝起身見到太陽伯伯太好啦 !! 食個早餐向奇妙旅程出發.... 米老鼠我嚟啦 ~ 雖然02年同大少去過日本啲迪迪尼，但係搵唔到米老鼠影相 .. 所以有啲失望，雖然今次係去香港啲迪迪尼，大少仲要返工無同我一齊去，希望搵到米老鼠影張靚靚相就好啦 ! 入到迪迪尼比想像中好，個個朋友仔都係香港迪迪尼仲細過日本嗰個無咩嘢玩 .. 無所謂啦 ! 都係想開開心心玩返日，仲係米老鼠廚師餐廳食懶豬添 ..yeah !! 雖然最後都無時間搵米老鼠影相，但係都好開心 .. 仲買咗啲戰利品添 .. 咩嚟 .. haha 緊係米老鼠啦 ....

蘿蔔糕

仲有2日就農曆年啦，又係整蘿蔔糕啲日子，前幾日睇蘇 GOOD見到亞蘇家姐教整芋頭糕都想整返底食吓 ! 睇落好似幾易整咁，今日買蘿蔔啲時候見到啲芋頭幾靚決定買返個嚟整芋頭糕先，買整材料開場啦 ....

實在太香，煎返幾件啲食吓先 ....

材料 :
白蘿蔔 (刨絲)                   7斤
粘米粉                             1包 (減1杯)
澄麵粉                             1杯

冬菇 (切粒)                       12隻

臘腸 (切粒)                       半斤
潤腸 (切粒)                       半斤
干貝                                 12粒
(加水至干貝面蒸20分鐘，撕成干貝絲備用)

調味料 :
鹽                                    4茶匙
糖                                    1茶匙
蠔油                                 1/3瓶

胡椒粉                              大量

蔥                                    適量

做法 :
1. 蘿蔔絲下鑊煮至軟身 (可加入3湯匙干貝水同煮至半熟)，熄火下調味料攪勻。
2. 將冬菇、臘腸、干貝絲爆香，加入蘿蔔絲攪勻。
3. 分數次將粘米粉及澄麵粉篩入材料中攪勻 (注意 : 不能有粉粒)。
4. 將料材倒入糕盆內，用大火蒸45分鐘。

參考食譜 : 蘇 GOOD