惹味羊腩煲

今日得16度，終於等到天氣轉冷可以整羊腩煲啦 ~  冬天食羊腩煲真係好正架.. 今朝去咗街市同牛肉佬留咗羊腩同牛腩，放工去攞咗就返屋企炆 !!

材料 :

羊腩                            2斤

馬蹄                            1磅

冬菇                            20隻

南乳                            1大磚

惹味醬                        1小杯     

薑                                適量

蔥                                適量

酒                                適量

水                                適量

鹽                                適量

枝竹                            適量

做法 :

1.   羊腩斬件用白鑊爆香，加入薑片、酒炒香，放入滾水至肉面煮數分鐘，羊腩盛起隔水備用。

2.   冬菇用水浸軟，隔水備用 (冬菇水可以代替水嚟炆羊腩架)，馬蹄去皮。

3.   下油加入薑片、南乳及惹味醬爆香，放入羊腩炒勻，下酒後加入冬菇、馬蹄，再加水至羊腩面，用高速煲煮15分鐘，最後加入枝竹煲10分鐘，下鹽調味後灑上蔥即可。

   食用時可用腐乳醬加入檸檬葉絲伴食。