冬菇雲耳荷葉蒸滑雞

今晚約咗幾位好友到我家食飯，大少話要食蒸雞，平時我好少蒸雞，多數整海南雞或者浸雞，今次真係有啲比佢考起 .... 最後決定加返荷葉嚟蒸，大少又做白老鼠呢，哈哈 ~

材料 :
泰安雞 1隻
冬菇 8隻
雲耳 約20g
乾荷葉 1塊


醃料 :
生抽 3湯匙
蠔抽 1湯匙
薑汁 1湯匙
紹酒 1湯匙
蛋白 1隻
麻油 少許
浸冬菇水 約1-2湯匙


做法 :
乾荷葉放入滾水中，煮至軟身，盛起洗淨，備用
冬菇浸軟去蒂，雲耳浸軟，切去中間硬物，備用
雞洗淨吸乾水份，斬件，加入醃料及其他材料拌勻，醃約1小時
荷葉放入蒸籠內，將材料平均放置於荷葉上，荷葉包好
用中火隔水蒸約15-20分鐘至雞熟透，即成

平安夜

今年平安夜唔想出街食，大少話係屋企食西餐，所以買咗啲材料同扒返屋企，加埋個南瓜湯，yummy ~

白汁磨菇天使麵

忌廉南瓜湯

冬至羊腩煲打邊爐夜

今晚大少約咗幾位好友一齊過冬至，羊腩幾日前已經同肉店留咗，尋日已經炆好，今日買定材料等大少放工返嚟就食得

做冬晚餐 @ 熊場

今日同家人一齊做冬，大少提議去熊場食日式放題，等我有時間去準備聽日嘅羊腩煲同打邊爐 ~

豆腐沙津

炸廣島蠔

牛肉壽司

頭盤 : 刺身併盤

刺身

海膽蝦壽司

仲有呢啲壽司

甜蝦刺身

串燒

海膽壽司

汁煮牛脷

燒三文魚頭

最後巧 full 呢 ~

 

倆口子晚餐

大少投訴近期無住家飯食，所以今日就整過晚餐佢嘆吓，見天氣凍凍地就整咗個煲仔飯，加個菜同條魚，唔洗30分鐘就食得呢 ~

是日晚餐

香煎黃花魚

自家製魚湯瀨尿蝦乾浸翡翠苗

鵝肝腸煲仔飯

鈎織 ~ 披肩頸巾兩用款式

呢條披肩頸巾兩用款式係剛出嘅新書封面，一睇已經愛上，跟書用返 Alpaca Mohair 冷，但就唔係同一色，鈎返條比自己今年冬天用啱晒

毛冷 : Alpaca Mohair (日本)

色系 : 16

重量 : 25g / 個 (約長 110m) x 8個

鈎針 : 4/0號

鈎織 ~ 頸巾

剛出嘅編織書，一看封面就愛上這條頸巾，買咗3個bb冷織比喫仔同佢表弟妹，希望佢地鐘意，原本套孔位置外圍4點及中間1點係凸起，驚小朋友會鈎起，所以我改咗平針，出嚟效果都幾好 ....

上 : 全長約 62cm
中 : 全長約 52cm
下 : 全長約 44cm



簡便晚餐

今晚大少踼波，所以炒個銀針粉，煲個湯做晚餐就ok，未佢食得太 full 走唔到呢，haha ~



材料 :
銀針粉 半斤
四季豆 約4両
靈芝菇 1包
甘筍 半條
紹興酒 少許
蛋 1隻 (打勻)
自製魚湯粒 1粒 (約2湯匙)
煲仔飯豉油 適量
鹽 適量


做法 :
四季豆洗淨，切絲
甘筍刨皮，切絲
靈芝菇切去蒂部
下油炒四季豆、甘筍及靈芝菇，加入魚湯煮至收汁，於鑊邊灒入紹興酒，下銀針粉炒勻後，將材料推至鑊邊，鑊中間位置下少許油，加入蛋液，待成蛋皮後用鑊鏟切成蛋絲 (因為我懶唔想煎蛋皮後再切絲，費時洗咁多嘢，hehe)，加入煲仔飯豉油炒勻，加入鹽調味即可



呢個湯係湯包嚟架 ~ 材料係呢樹，有止乾咳作用，今次加埋木瓜，太子參味無咁重，大少無投訴呢 ....

天冬太子參止乾咳湯

今日呢個湯係海味鋪老板娘教，佢見我乾咳無痰所以教我煲呢個湯，至於份量我就唔清楚因為係湯包嚟架，傾吓傾吓先知原來老板娘係讀過中醫架，真係勁 ~

湯包材料 :

天冬、百合、玉竹、黨參、果皮、太子參、南杏、桔梗、蜜棗、豬展、水 14碗

做法 :

豬展汆水，備用

將所有材料放入煲內，大火煲滾10分鐘後轉細火煲2小時，下鹽調味即可

** 此湯有效修復喉嚨損傷，適合乾咳無痰人士

天冬功效 : 養陰生津，潤肺清心 (用於肺燥乾咳、虛勞咳嗽、津傷口渴、心煩失眠、內熱消渴、腸燥便秘、白喉)

海底椰川貝杏仁鱷魚肉湯

之前感冒後氣管敏感一直未好，所以就煲吓鷓鴣、鱷魚肉湯飲吓，今日就煲返個鱷魚肉湯，呢個湯有滋補肺腎，化痰止咳，對肺氣弱容易易咳嗽，哮喘好有幫助架，啱晒我呢 ~

材料 :

海底椰 3錢

川貝母 3錢

南北杏 1両

乾鱷魚肉 2両

陳皮 1塊

無花果 2-4粒

水 8碗

做法 :

將所有材料放入煲內，大火煲滾後，轉細火煲約3小時即可

食譜參考 : 芳姐保健湯餸

蟲草花燉螺頭

呢個湯係之前係生果日報見到，今日好想飲返個螺頭湯，所以就整嚟試吓，今次個湯比較濃味，因為有金華火腿一齊燉，個湯味道好鮮味，正呀 ~

材料 :

蟲草花 約1両

瘦肉 約300g

急凍螺頭 約250g

金華火腿 約50g

水 約4碗

鹽 適量

做法 :

蟲草花浸軟，汆水備用

螺頭解凍後，切件

瘦肉洗淨、金華火腿洗淨後切件

螺頭、瘦肉、金華火腿，汆水備用

將所有材料放入燉盅，細火燉2.5-3小時，下鹽調味即可。

蟲草花燉瘦肉湯

呢個湯係 何師奶 個blog 到見到，自從上次用蟲草花煲鷓鴣後就愛上了蟲草花，功效同蟲草差唔多，但價錢就差好遠呢 ~ 見煲咗幾日鱷魚肉湯，所以今日嚟返個燉湯比大少，但我就無用蜜棗改咗用無花果，因為蜜棗糖份太高唔係好啱大少飲

材料 :

蟲草花 約 1両

瘦肉 (攪碎) 約20大洋

陳皮 1角

無花果 2粒

做法 :

蟲草花用水洗淨，汆水備用

陳皮用水浸軟，刮去瓤

將豬肉碎放入燉盅，加入陳皮、無花果及蟲草花，再加入適量水

煲加入適量水煲滾再放入燉盅，用高速煲，煲滾後轉細火煲約30分鐘，待排氣後即可

**蟲草花功效和冬蟲草有點相似，有滋肺補腎、護肝、抗衰老、鎮靜、降壓、提高身體免疫力等功效

呢個湯有補肺益腎、增強免疫力功效架 ~

川貝海底椰鷓鴣鱷魚肉湯

天氣轉變氣管又有投訴，剛剛開始咳，所以煲返個鱷魚肉湯飲吓先，今次加咗太子參係南貨舖太子女教嘅，好彩煲出嚟無咩太子參味，未大少實ko我 ~

 

材料 :

鷓鴣 1隻

乾鱷魚肉 2両

豬展 約 30大洋

太子參 約 20g

乾百合 約 1両

海底椰 約 半両

南北杏 約 1両

川貝 約半両

水 約8碗

陳皮 1角

做法 :

鷓鴣、鱷魚肉及豬展汆水，備用

陳皮用水浸軟，刮去瓤

太子參、乾合百、海底椰、南北杏及川貝用水清洗

將所有材料放入煲，用大火煲滾10分鐘後，轉小火煲2-2.5小時，下鹽調味即可

自家製高湯冰

煲粥我多數會買梭羅魚加d魚骨嚟熬個魚湯底先，再用個魚湯底嚟煲粥，需然有高速煲但每次都要花成個鐘先有得食，平時買魚煲粥或者BBQ都會叫魚販幫我起埋肉，魚骨就留返放係冰箱煲存，得閒就將d魚骨熬個魚湯底，再將魚湯急凍做成冰粒，需要時再取出所需份量解凍用嚟烹調，非常好方便呢~ 今次清理冰箱見到有魚骨同之前整豬手凍剩底嘅豬骨，所以就用嚟整定個魚湯，順便清吓個冰箱

 

材料 : 魚骨、魚頭、豬骨、薑、滾水、紹興酒

做法 :  

魚頭、魚骨去鰓、血絲及內臟，洗淨切件，吸乾水份

 

燒熱油，爆香薑，下魚骨及魚頭煎至二面金黃色，灒酒

  

下滾水至魚骨面，轉細火煲約1.5小時，隔去油及渣，待冷倒入模或製冰格內，急凍成魚湯冰粒，再放入保鮮袋或盒內保存，備用

五香鹹蛋

呢個食譜係 Jacky Yu 「留住四季美味」 入面睇到，真係越嚟越鐘意呢本食譜鹹蛋之前已經醃過，但只係加咗乾玫瑰，無落香料個食譜啲香料屋企都有，無買到皮蛋，今次試吓用雞蛋先，因為唔想去街市買呢

材料 : 雞蛋8隻、水、粗鹽、花椒、八角、草果、丁香、桂皮
工具 : 1L玻璃樽

做法 :
雞蛋洗淨，抹乾水份
水、鹽及香料一起煮滾，等d香料出味，攪拌均勻，等d粗鹽完全溶解，待涼備用

水份完全冷卻，連埋雞蛋放玻璃樽內，醃約一個月後，攪掂

小小貼士 :
由於水份含鹽的濃度較高，所以浮力很強，雞蛋入樽後會浮起，如果d蛋唔可以完全浸係鹽水，d雞蛋就無咁吸收味道，想d蛋味道均勻吸收，可以每隔一星期將d蛋輕輕攪拌吓，等d味道可以均勻吸收

鹹蛋醃夠一個月就可以撈起食用或放入雪櫃存放，醃得越長時間就會越鹽呢 ~

蝦汁燴春雞

星期日睇咗 「煮角」Ricky 呢個菜覺得好得意，蝦同雞係未真係夾架
平時都會用蝦殼做嘅湯嚟煮意粉或者整冬陰功湯，配雞就未試過，但我就改咗少少個食譜呢

材料 :
法國春雞  2隻
蕃茄  2個 (切粒)
車厘茄  1盒 (切半)
檸檬汁  少許
海蝦  1斤
洋蔥  1個 (切粒)
牛油  約20g
忌廉  約200ml
橄欖油  1-2湯匙
蕃芫荽  適量
龍蒿 (Terragon)  適量
水  適量
鹽  適量


做法 :
春雞切件 (翼、肶及胸)，洗淨吸乾水份，用少許鹽醃15-30分鐘

雞殼洗淨，吸乾水份，切件
海蝦去頭及殼 (切細小小，留用)
蝦身去腸，洗淨吸乾水份用少許鹽醃約15分鐘

牛油及橄欖油放入煲內至牛油溶咗一半 (要小心好易變黑)，加入海蝦頭及殼炒香


下洋蔥粒用中火煮約5-10分鐘

下雞殼、蕃茄粒及水 (至材料面即可) 大火煮滾後
   

轉用細火煮30-45分鐘至水份得返一半


將蝦汁放入攪拌器內打蓉隔渣後，放回煲內

將雞件、忌廉放入蝦汁內，大火煮滾後，轉細火燴再約10分鐘
再加入海蝦肉、車厘茄、蕃芫荽、龍蒿，轉細火煮約3-5分鐘至蝦熱，下鹽調味，食時加入檸檬汁



小小心得 :
原食譜係用雞湯，但我唔想浪費d雞殼，所以用埋嚟煮個蝦汁
原食譜嘅蕃芫荽及龍蒿係用新鮮嘅，但我買唔到，所以只用乾萫芫荽代替


參考食譜 : 「煮角」