青梅出沒 ~ 注意

每年近清明節就係青梅出沒的時間，又係泡製梅酒嘅時間，能親手為至愛親朋泡製梅酒，見到大家開心地分享就是一樣不能形容的幸福 .... 梅子酒不但好飲，據說還有袪風濕、健脾開胃、消除疲勞等食療功效

尋日去街市見到有青梅，買咗幾磅返嚟，清洗風乾，就可以入樽啦，今次用咗個8L嘅樽，剛好裝晒，之前浸啲梅酒朋友仔太鐘意飲，所以今年會浸多啲呢 .... 期待與您們一起品嚐

 

粟米朧脷柳 ● 香草蒜蓉芝士焗西蘭花

今日大少話要食粟米朧脷柳，呢個餸之前都整個，但我就無炸啲魚柳只係半煎炸方式處理，除咗可以用少啲油又健康之外，加埋我好怕炸完嘢咁大鑊油點處理，最後加埋個西蘭花就攪掂呢餐，仲有時間處理我啲青梅，準備浸梅酒呢 ~

蝦子柚皮

柚皮我唔係好食，點解會整，未就係大少鐘意食，每次去食車仔麵佢都會叫柚皮，攪到我成日心思思想整，係街市見到有柚皮買，幾個大洋就有交易，查實柚皮本身唔值錢，但處理嘅功夫就好多，處理得唔好又有澀味喎，個老板仲好好人，教我點處理 ..... 只係處理個柚皮都攪咗2、3日，所以好少地方都有得食啦 ~

材料 :

已處理柚皮 2塊

自家製魚湯 適量

蒜頭 2粒

調味料 A:

冰糖 1細粒

魚露 2湯匙

鹽 少許

調味料 B :

自家製魚湯 2-3湯匙

蠔油 少許

麻油 少許

鹽 少許

蝦子 適量 (炒過)

做法 :

平底鍋下油，爆香蒜頭，將柚皮平放入鍋中，煎香柚皮2面，盛起

鍋內加入魚湯煮滾，下調味料A攪勻，放回柚皮，慢火煮至魚湯收乾，柚皮上碟，備用

鍋內加入調味料B煮滾，淋上柚皮上，最後加上蝦子

柚皮處理 :

刨去柚皮黃色部份 (只留下白色部份)

煲滾一大煲水，加入柚皮 (水份要蓋過柚皮面，煲內不能沾油) 煮約5分鐘，再翻轉煮5分鐘 (柚皮要完全吸收水份至軟身)

取出柚皮隔去水份，用水沖至冷卻，用手輕輕擠壓水份

煲內放一鍋水，放回柚皮水要浸過柚皮面 (如柚皮浮起可放大碗係面壓住)，浸約2-3日至沒有澀味 (期間每數小時換水一次，每次換水必須用手輕輕擠壓水份，才能去咗柚皮上的澀味)

晚餐料理

柚皮係大少每次食車仔麵都會點嘅餸嚟，但近期就好少叫，佢話唔好食又有澀味喎，前幾日係街市見到有柚皮賣，幾個大洋就有交易，個老板仲好好咁教我點處理，呢個真係功夫菜，大少話係街食過要成幾十個大洋1件，雖然係幾蚊嘅嘢，但真係幾花時間去整，希望大少鐘意食呢 .... 未真係浪費晒啲時間同心機囉 ~

今日又安歌返潤肺止咳嘅款冬花湯，正呀 ~

鵝肝腸田雞煲仔飯

煎蝦卷

花咗幾日處理再用魚湯炆嘅蝦子柚皮，第一次正大少話好味，好食過車仔麵店個啲，又無澀味，巧開心

大家要食就要快啲買啦，老板話就嚟無啦，要等到11月先再有柚皮賣

潤肺止咳款冬花湯 ● 叉燒餐肉粟米粒粒炒飯

氣管敏感咳到甩肺咁，連喉嚨都腫咗，聲又沙埋，醫生話再係咁要轉用哮喘藥 .... 所以就去幫襯開嘅海味鋪搵老板娘整返個天冬太子參湯包，希望飲返個湯條氣管會舒服返啲，今次老板娘見我聲到沙埋話我太濕介紹咗另一隻湯包比我，等我可以快啲減輕啲咳同喉嚨腫痛，嘿嘿 ~

 

 
呢個湯無論係寒咳熱咳都飲得，平時飲有潤肺作用 (連發燒及孕婦都可以飲架)

款冬花主治 : 潤肺下氣、止咳化痰

桔梗主治 : 咽喉腫痛、咳嗽痰多
飲咗個湯喉嚨舒服咗啲，把聲都無咁沙，太好了 ....

 

再炒埋呢個炒飯，簡簡單單就一餐了

自釀梅酒 ‧荔枝酒開封

梅酒同荔枝酒都係2012年浸的，聽日同朋友仔去 BBQ 所以開封比大家品嚐吓，又可以清吓個廚櫃咁今年先有位置再浸梅酒呢

 

蘿蔔炆牛腩

病咗成個禮拜，大少同我睇完醫生話同我去食雲吞麵，佢就叫咗個筋腩撈麵，大少食咗1淡就話啲筋腩炆得唔淋好鬼硬 .... 完全唔好食，所以我尋日就打電話比牛肉佬叫佢留返啲靚嘅牛筋同腩比我，等我整返比大少食等佢開心吓呢 ~

食譜在此

止咳 ~ 燉洋蔥

感冒咗幾日，而家係咁咳就嚟肺都甩埋，今日見到大少奶係fd post 出嚟話燉洋蔥可以止咳，就去買個洋蔥試下，其實有好多人話燉橙都得，但我試過唔得呢 .... 希望燉洋蔥得啦，唔想再食西藥囉 ~

洋蔥1個去皮，切絲

將1個細碗反轉放入大碗中，再加入洋蔥絲 (唔洗加水)

蓋上煲蓋隔水燉30分鐘後 .... 洋蔥變得軟身

拿掉洋蔥及小碗，就會見到洋蔥水呢，神奇嗎? 燉出嚟得小小洋蔥水，淡淡的洋蔥味，唔難入口

飲咗之後係少咗啲咳，但可能我之前咳得太勁，醫生話聲帶腫咗發炎，最後都係要食返西藥，嘿嘿 ....

家鄉炆豬肉

點解呢個餸叫家鄉炆豬肉，呢個餸我第一次係係舅母屋企食，初時以為係舅母嘅家鄉菜，後嚟先知原來係大少外婆新會嘅家鄉菜嚟架 ~ 大少好鐘意食

以前每年去舅父家拜年舅母都會整比我地食，不過都好多年無食過，呢幾年去舅父家拜年多數都係出街食，雖然今年我地都會出街食，但舅母就整咗比我地食，呢個菜我多年前已經係舅母樹學咗，不過就只係整咗1次比大少食，今年大少無去舅父樹拜年所以無得食，咁我未整過佢食呢 ~

牛鰍魚沙參玉竹湯 ‧ 潤腸黃鱔煲仔飯

上個禮拜係新派煮意學咗個韓式牛肉飯，諗住今日整比大少食，點知天氣又轉冷，大少話要食煲仔飯，所以今日就整返個潤腸黃鱔煲仔飯同牛鰍魚湯，簡簡單單又一餐呢 ~

 黃鱔煲仔飯

材料 :

米 1杯

水 1杯

黃鱔 1條

薑絲 適量

醃料 :

生抽 1/2湯匙

紹酒 1/2湯匙

胡椒粉 適量

做法 :

黃鱔去骨，用粗鹽及生粉清洗數次去潺，洗淨瀝乾水份，切絲，用醃料醃約10分鐘，備用

米洗淨瀝乾水份，放入煲內加水，用中火煮約5分鐘至收水，將黃鱔及潤腸放飯面，再放上薑絲，加蓋，用熳火煮約5分鐘至熟，熄火焗約10分鐘，食時淋上煲仔飯豉油，即可

 

牛鰍魚沙參玉竹湯

材料 :

牛鰍魚 約1.5斤

沙參 約1両

玉竹 約1両

薑片 2片

滾水 約2ml

做法 :

沙參、玉竹用水沖洗後，瀝乾水份，備用

牛鰍魚洗淨，瀝乾水份，下油爆香薑片，將牛鰍魚煎至兩面金黃，加入滾水煮滾後，再加入沙參及玉竹，猛火煲1小時，即可

** 此湯 : 清潤止渴、治陰虛火旺、調理咳嗽