蕃茄蘋果汽酒燉牛肚

早前係亞銀 blog 都見到呢個菜已經好想整，可惜當是未有食譜，最近見到亞銀加咗食譜，搵咗幾日終於比我買到急凍牛肚，雖然無亞銀整得咁靚仔 .... 但真係好好味呀 ~

材料 :

急凍金錢肚                        1個

蒜頭                                    2粒 (切碎)

洋蔥                                    1個 (切件)

甘筍                                     2條 (切件)

蘋果汽酒(cider)                  200ml

罐頭蕃茄                             1罐

牛肉湯                                 400ml

油浸鯷魚                             2片

月桂葉                                 1片

百里香                                 少許

小洋蔥                                 8粒

黑水橄欖                             10粒 (我無落因為唔食呢)

意大利蕃茜                         少許 (切碎)

汆水材料 :

月桂葉                                  1片

原粒黑椒                              1茶匙

蒜頭                                      1粒 (拍碎)

水                                           適量

做法 :

金錢肚解凍、洗淨，將汆水材料入煲內煮沸，瀝乾切粗條待用。

燒熱煲後，下湯匙橄欖油爆香蒜頭、洋蔥，再加入牛肚拌炒一會。再下蘋果汽酒煮一會，待揮發1／3酒量後，下罐頭蕃茄、甘筍、鯷魚、月桂葉及百里香，最後加牛肉湯至剛好蓋過材料。煮滾後下少許鹽，加蓋慢火或入爐180度，燜45分鐘﹣1小時，或至牛肚軟化。 (我就用高速煲煮約15分鐘，待高速煲自行排氣)

最後下小洋蔥及黑水欖煮約15分鐘，下鹽及黑胡椒調味，灑上意大利蕃茜，食得呢 ~

食譜來源 : 阿銀廚房筆記