新作 ~

收到 Honey 要求幫忙嘅溫暖牌頸巾，係比喫仔表妹呢

契仔既溫暖牌頸巾

呢個頸巾記憶中係小學時期既1個興趣班學既，只係織過1條交功課呢 ~ 而家唔係好記得點織囉 .... 去到冷舖買冷個陣好好人既老板娘借咗個差唔多款式既圖比我參考，好彩最後都織到出嚟 ....

川貝燉雪梨

又係川貝燉雪梨，食咗個幾月西藥，啲咳都係唔停真係唔想再食西藥，尋日買鷓鴣煲川貝一家人飲，原來急凍鷓鴣都好貴架 ~ 成120蚊隻個店員話用嚟燉會好啲，1隻可以分2次飲 (1個人)，我地9個人燉湯太貴啦，最後買咗2隻加埋川貝同其他材料煲湯成5百蚊，真係有啲肉赤 ，所以今日嚟個平啲燉雪梨 ~

尋日去位元堂買川貝既時候個姐姐話我燥底加埋食咗成個月西藥，教我加埋陳皮去燉川貝會好啲，仲可以化痰架 ~

材料 : 雪梨2個 (切件去芯)、川貝3錢、陳皮2塊加埋水燉咗1個鐘，最後加埋蜜糖。

燉好打開好香陳皮味，比用南北杏燉好味，可能因為陳皮關係覺得川貝無咁苦 ~

番茄炆牛展

平時多數都係滷水牛展，之前係雜誌見到番茄炆牛展，比個賣相深深吸引，放工去買鷓鴣煲湯見到有牛展，所以買嚟試吓，仲將啲汁加埋意粉一齊食，yummy

材料 :

牛油                                                  50g

乾蔥 (切片)                                       2顆

蒜頭 (切片)                                       2顆

洋蔥 (切片)                                       2個

薑 (剁蓉)                                           1湯匙                

番茄醬                                               3湯匙

金錢牛展 (汆水備用)                        1條

番茄 (切粒)                                        2個

水                                                        720 ml (我用咗雞湯，因為無牛肉粒)

調味料 :

牛肉粒                                                1粒

糖                                                        1茶匙

鹽                                                        1茶匙

即磨黑胡椒                                        少許

粟粉水                                                少許 (我無落)

做法 :

下牛油煮溶，爆香乾蔥、蒜頭、洋蔥及薑蓉

加入番茄醬，下牛展、蕃茄粒期間一直攪至拌勻

加入雞湯、調味料，以熳火炆約1小時至牛展軟腍 (我用高速煲，煲咗15分鐘)，最後加入粟粉水，將牛展切片，食得呢 ~

  個汁用嚟拌意粉食，好好味架

食譜來源 : 新假期 ~ 571